Nasa marhay na kamugtakan na an siyam na mga estudyante kan Casiguran Technical Vocational School (CTVS) sa Casiguran, Sorsogon, na idinalagan sa Rural Health Unit – Casiguran matapos na madismayo kasuudma, Abril 20, mantang nasa laog kan saindang classroom.
Segun kay Dr. Juan Carlos Caindec kan RHU – Casiguran, panic attack an rason kan sunod sunod na pagkadismayo asin pagsisiyak kan nagkapirang estudyante kan CTVS na nangyari sa kasagsagan kan init kan panahon.
Segun pa kay Caindec, siguruhon pirmi na hydrated asin iwasan an pagluwas nin harong lalo na kun peak hours kan kainitan. Alagad kun dai maiiwasan, magsulog nin kalo o maggamit nin payong.
Dai pa man nagpapaluwas nin opisyal na pahayag an CTVS matapos kaining suspindihon an klase kasuudma durante kan insidente. I via Joey Galicio