Dai na nin buhay kan matuparan kan sarong parasira an sarong lalaki pasado alas syete nin aga kan Sabado, Enero 21, sa Barangay Cawit, Casiguran, Sorsogon.
Sa report kan Casiguran Municipal Police, bago makua sa dagat an pinagbistong si Jeffrey Grecia Hantic, 32 anyos, sarong kargador sa Casiguran Plaza asin residente kan Barangay Tulay, Casiguran, nakipag-inuman suboot an biktima kaiba an duwa kaining amigo. Nagkarigos suboot ini sa salog sa Barangay Tulay asin buminalyo sa ibong na salog (Kayaking Area) sa Barangay Central na nahiling sa kuha kan CCTV’s pasado alas dyes nin banggi kan Biyernes, Enero 20.
Makalihis an haros pirang oras na pagkarigos, naenot na mag-uli an saro sa mga kaiba kan biktima asin nawalat sa lugar si Hantic asin saro pa kaining amigo. Suminunod naman na nag-uli an saro pang kaibanan ni Hantic pakalihis nin pirang oras hasta sa nagsolo na sana an biktima sa lugar.
Kinaagahan, nahiling na sana kan sarong parasira si Hantic na dai na nin buhay asin nagpapataw-pataw sa dagat harani sa Barangay Cawit, Casiguran. Nahilingan ini nin nagkapirang lugad sa manlaen laen na parte kan saiyang hawak.
Nangapudan man an mga kapamilya ni Hantic sa duwang nakaibanan kaini na mag-istorya sainda kun ano an nangyari kay Hantic bago pa man ini makuhang gadan.
Sa presente, hagad kan pamilya an tabang pinansyal tanganing makadagdag sa panggastos sa pagpapalubong kan biktima. I via Joey Galicio
Photo: Jobert Lovedorial