Lalaking nabagsakan nin kahoy sa Sorsogon kan bagyong Paeng, binawian na nin buhay

Binawian na nin buhay an saro sa duwang lalaking nabagsakan nin kahoy kan acacia durante kan kasagsagan kan Bagyong Paeng sa syudad nin Sorsogon.

An 22 anyos na si Christopher Duka iyo an binawian na nin buhay kasuudma mantang naka-confine sa Sorsogon Provincial Hospital segun sa pinsan kaining si Karen Anne Artiaga.

Si Duka iyo an naka-angkas sa motorsiklo kan aksidenteng mabagsakan nin kahoy nin acacia pasado alas nuwebe nin banggi kan Oktubre 28 durante kan bagyong Paeng. Si Duka iyo an palaog suboot sa trabaho kan mangyari an aksidente. Haros duwang semanang naospital an biktima bago ini binawian nin buhay.

Sarong working student si Duka na nasa 2^nd year na kuta ngonyan sa kursong Bachelor of Science in Tourism Management sa Sorsogon State University.

Dai pa man suboot nagpapaabot nin tabang an manihamento kan pigtatrabahuhan ni Duka na sarong courier services. l via Joey Galicio