Sarong 55 anyos na lalaki an tinigbas alas 12:30 nin maagahon kan Miyerkules Santo, Abril 5 sa Barangay Gimagaan, Donsol, Sorsogon.
Pigbisto an biktima na si Calixto Abordo, residente kan nasambit na lugar.
Segun sa mga otoridad, igwa nin napansin an aking babaye kan biktima na may nagsisirip sa bintana kan saindang harong. Pigluwas ini kan biktima asin ginamitan nin flashlight. Digdi na nahiling an suspek asin basta na sana kaining tinigbas an biktima.
Nabisto an suspek na si Vivencio Abao, 45 anyos na residente kan Butuan City asin presenteng nag-iistar sa Barangay Gimagaan, Donsol, Sorsogon.
Nagsuprir nin tama sa walang parte kan kamot asin payo an biktima na tulos man na dinara sa ospital mantang naaresto an suspek sa Barangay Pangpang, Donsol, Sorsogon matapos an hot pursuit operation. I Joey Galicio