Dead on arrival an sarong pulis asin saro na sibilyan sa magkahiwalay na aksidente na nangyari maagahon ngonyan na Sabado, Abril 1, sa probinsya nin Sorsogon.
Segun sa impormasyon, pasado alas 3:10 nin maagahon kan maaksidente sa Barangay Buenavista, Irosin, Sorsogon an 26 anyos na si Pat. Jan Julius Anonuevo Avillano, residente kan Barangay Sto. Domingo, Irosin, Sorsogon na naka assign sa 2nd PMFC Bulan/Sorsogon PPO.
Pasiring kutana an biktima sa Bulan sakay kan saiyang pigmamanehong motor kan pag-abot sa palikong lugar, nag-over shoot asin nakabangga ini sa outpost sa nasambit na Lugar. Idinalagan man ini sa Irosin District Hospital alagad pigdeklarang dead on arrival.
Saro man na aksidente an nangyari pasado alas 4:30 sa Barangay Fabrica, Bulan kun sain sarong dai pa nabistong lalaki an naaksidente. Segun sa mga otoridad, may langkaw ining 5’6”, may tattoo sa daghan asin nakasulog nin t-shirt dangan shorts.
Pigmamaneho kan biktima an saiyang scooter kan makalagpas ini sa linya asin nakabanggaan an papaabot na forward truck na pigmamaneho man kan sarong Elmer Gliponeo, 36 anyos na residente kan Brgy. Otavi, Bulan, Sorsogon. Dahilan kan kusog kan pagkakabangga, nagkaigwa nin tama sa lawas asin payo an driver kan scooter na tulos man na pigdara sa hospital kan mga rescuer pero pigdeklarang dead on arrival.
Sa presente nasa kustodiya kan Bulan Municipal Police ang driver kan truck. | via Joey Galicio