Irido an apat (4) na persona makalihis na maaksidente an piglulunadan na tricycle pasado alas 11:30 nin banggi kan Sabado, Marso 25, sa Barangay Bacolod, Juban, Sorsogon.
Binisto an driver kan tricycle na si Alejandro Judin, 45 anyos asin sarong paratukdo, asin lunad niya an 41 anyos na si Jinkee Judin na saro man na paratukdo asin duwang aki na edad santaon asin 8 anyos. Gabos sinda mga residente kan Barangay Cogon, Juban, Sorsogon.
Segun sa mga otoridad, pigbabaybay kan tricycle an tinampo kan pag-abot sa Barangay Bacolod, nawaraan nin kontrol si Judin sa pinagmamanehong tricycle asin buminangga sa kasabatan na Wing Van Truck. An truck pigmamaneho ni Rolando Macabodbod, 43 anyos na residente kan Sto. Nino, Quiot, Cebu City. Gikan sa Juban an truck na pasiring kuta sa Irosin, Sorsogon.
Lugadan an driver kan tricycle asin mga pasahero kaini mantang narapak man an tricycle asin enotan na parte kan truck. Tulos man na pigdara sa ospital an mga nairidong persona. I Joey Galicio
Photos: Juban MPS, MDRRMO Juban