Irido an sarong 64 anyos na lalaki kan mabangga kan kasabatan na bus an pigmamaneho kaining jitney isuzu pasadp alas otso ngonyan na Martes, Marso 7, sa Maharlika Highway Barangay Trece Martires, Casiguran, Sorsogon.
Segun kay Joel Hilario, 52 anyos, residente kan Barangay 32 San Roque, Legazpi City asin driver kan pampasaherong bus, gikan sinda sa Legazpi City asin pasiring kuta sa banwaan nin Bulan. Alagad pag-abot sa lugar, nakabanggaan ninda an sarong Jitney Isuzu na kargado nin niyog na pasiring sa Sorsogon City para magdeliver asin pinagmamaneho ni Severino Halum, 64 anyos na residente kan Barangay Gogon, Casiguran, Sorsogon.
Sa imbestigasyon kan Casiguran Municipal Police, nagluluwas na nag-overtake an pampasaherong bus na nagresulta para mabangga ang kasabatan na behikulo na pinagmamaneho ni Halum.
Sa kusog kan pagkakabangga, narapak ang enotan na parte kan jitney isuzu asin naipit an driver kaini na nagresulta sa pagkakaigwa nin lugad sa bitis, kamot asin payo.
Narapak man an walang parte kan bus. Dai man nin makulugan sa dai mababa na sampulong pasahero kan bus alagad nalugadan sa tuong kamot an konduktor kan bus.
Tulos man na pigdara sa Sorsogon Provincial Hospital ang driver kan Isuzu para sa medikal na atensyon
Sa presente nasa kustodiya na kan Casiguran Municipal Police Station an duwang behikulo mantang nangangapudan man nin tabang pinansyal an mga kapamilya ni Halum na kaipuhan ipasairarom sa operasyon. I via Joey Galicio
Photos: BFP Casiguran