Pigtuturing na bayani ngonyan sa sarong barangay sa Pilar an kinse anyos na si Keith John Devera kan Purok 6, Barangay Banuyo asin Grade 9 sa Pilar National Comprehensive High School matapos na mailigtas kaini an duwang kapwa menor de edad sa pagkalunod pasado alas 11:30 nin aga kan Biyernes, Pebrero 10.
Nagkakarigos suboot si Devera sa salog harani sa bukana pasiring sa dagat sa nasambit na lugar kaibanan an duwang menor de edad kan diit pang malunod an saiyang mga kaiba dahilan sa kusog kan agos kan tubig. Naisalbar ni Devera an mga ini na an saro iyo an saiyang kapitbahay asin an saro iyo man an saiya mismong pamangkin.
Alagad makalihis na maisalbar an duwang kaibanan, dae na nagbutwa si Devera hasta sa magkundukta na nin Rescue Operation ang pinagbiyong pwersa kan Municipal Disaster Risk Reduction and Management Office Pilar asin Philippine Coast Guard Pilar.
Pasado alas 12:30 na nin hapon kan parehong aldaw kan makua an lawas ni Devera.
Pigbalo man kuta na tawan nin Cardiopulmonary Resuscitation o CPR si Devera alagad pigdeklara ining dead on arrival sa Donsol District Hospital. I via Joey Galicio
Photos: PCG Pilar, Sorsogon