Gadan an sarong tricycle driver matapos ma-aksidente an pigmamaneho kaining tricycle pasado alas dos nin hapon ngonyan na Lunes, Enero 30, sa Brgy. Sogoy, Castilla, Sorsogon.
Sa report kan Castilla Municipal Police, pasiring sa Legazpi City an sarong Isuzu Truck (Tanker) na pigmamaneho ni Aldrin Bañez Vista, 52 anyos, residente kan Barangay Gubat Iraya, Bacacay, Albay na gikan sa syudad nin Sorsogon kan pag-abot sa crossing kan Barangay Sogoy, Castilla, biglang buminutwa an sarong tricycle na pigmamaneho ni Bernardo Ardales Abarientos, 54 anyos na residente kan Barangay Sipi, Daraga, Albay na gikan man sa Barangay Cagbacong, Legazpi City, Albay.
Nagluluwas sa imbestigasyon na amoy arak an driver kan tricycle asin an pasahero kaining nabisto man na si Lorenzo Ardales Masbate, kan mangyari an insidente.
Dahilan kan nangyaring banggaan, nagsuprir nin lugad sa manlain-lain na parte kan lawas an driver kan tricycle asin pasahero na tulos man na idinalagan sa Castilla District Hospital kan mga nagrespondeng personahe kan MDRRMO Castilla. Alagad binawian man giraray nin buhay an driver kan tricycle.
Pareho man na nagsuprir nin danyos an duwang behikulo na parehong nasa kustodiya na ngonyan kan Castilla Municipal Police Station. I Joey Galicio
Photos: PITIK Kastilya