Pawang mga natural na Cacao Tableas na kadalasa’y ginagawang hot chocolate ang ibinibida ni Nerissa Escorel mula sa bayan ng San Jacinto, Ticao Island, Masbate.
Isang taon pa lang simula nang magsimulang gumawa ng mga natural na cacao tableas si Escorel ngunit patok na patok na ito hindi lamang sa mga lokal na turista kundi ganon na rin sa mga bumibisitang turista mula sa ibang bansa. Aniya, nakaabot na sa Sweden, Portugal, at Australia ang kaniyang mga lokal na produkto.
“Nagkainteres akong magluto ng cacao para magkaroon ako ng sariling business, nung time na nakatikim ako ng mga chocolate galing Germany. Kaya gumawa ako ng hot cacao chocolate. At doon ako nag-umpisa gumawa at i-establish ang business ko,” saad ni Escorel.
Dagdag pa nito, ang kaniyang mga produkto ay walang halong anumang additives o preservatives kaya naman mas nagugustuhan ng kaniyang mga suki.
Sa kabila ng kaniyang tagumpay dahil sa mga suki niyang tumatangkilik sa kaniyang mga produkto, hindi naman ipinagkakaila ni Escorel na gaya ng iba ay nagsimula rin siya sa maliliit na hakbang.
Ikinwento nito sa isang panayam sa Bicoldotph na tatlong puno lang ng Cacao ang kaniyang pinagkukunan ng panghanap-buhay kaya naman lubos siyang nagpapasalamat na yumabong ang kaniyang maliit na negosyo.
Samantala, nais naman ibahagi ni Escorel ang kaniyang mga natutunan sa kadalasang pag-attend sa mga seminars at business meetings katuwang ang Department of Trade and Industry (DTI) na lubos na makakatulong sa kaniyang mga kababayan na gusto ring magsimula ng negosyo.
“Ang wish ko, makatulong ako sa mga kapwa ko mahihirap. Kahit papaano, ‘pag nag-improve na ang aking business, hindi ko kayang mag-isa. Kailangan ko ang aking mga kababayan, kung paano ako nakilala sana ganon din sila,” ani Escorel.
Sa mga nais mag-order, maaaring i-contact si Escorel sa pamamagitan ng kaniyang contact number (0946-005-8426) o sa kaniyang email (escorelnerisa@gmail.com). | Danica Roselyn Lim
