Preparado na ang Municipal Disaster Risk Reduction & Management Office kan mga banwaan kan Bulusan, Juban asin Irosin sa probinsiya kan Sorsogon encaso madagos an pagtuga kan Bulkang Bulusan matapos na itaas kan Phivolcs an alert level 1 sa palibot kaini.
Sa intrevista kan Pasalingaya News kay Arvee Lodronio, MDRRM Officer kan Juban, nakahanda na suboot an saindang opisina asin nagsagibo naman sinda nin Incident Briefing kaibanan an Lokal na Gobyerno kan Juban asin iba pang mga ahensya tangani na masiguro an zero casualty kan banwaan.
Pig-activate naman suboot an mga gagamiton na evacuation centers na dadalaganan kan mga residente na maebakwar kun magkaiwa nin pagtuga an bulkan mantang pighahanda naman an mga relief goods.
Segun pa kay Lodronio, maigot na ipigbabawal an paglaog sa 4 kilometer permanent danger zone. Duwang barangay na harani sa laog kan danger zone an pigmomonitor kan mga otoridad, an Añog asin Puting Sapa.
Sa Banwaan kan Bulusan, partikular na pigbabantayan kan MDRRMO Bulusan ang Barangay San Roque nin huli ta harani ini sa bulkan.
Segun kay Marcky Ragasa kan MDRRMO Bulusan, padagos an saindang pagbandilyo sa mga residente partikular an mga harani sa 4 km PDZ. Handa naman suboot an mga evacuation center encase mapautob nin forced evacuation.
Sa Banwaan man kan Irosin, an mga Barangay kan Cogon, Mapaso asin Patag an mga barangay na laog sa 4 km PDZ. Kun kinakaipuhan, dadarahon an mga pamilyang apektado sa INACT sa Barangay San Pedro, Irosin.
An mga Barangay naman kan Mabini asin Inlagadian sa banwaan kan Casiguran an igwang purok na nasa laog nin permanent danger zone asin pig-abisuhan naman na magin alerto sa anuman na aktibidad kan bulkan.
Sa Phivolcs advisory ngonyan na aldaw, naitala an 164 volcanic earthquakes sa palibot kan bulkan. I via Joey Galicio
