Padagos na pighahanap ngunyan kan mga otoridad an sarong 44 anyos na lalaki makalihis na masaksak kaini an saiyang agom kan Marso 6, sa islang Barangay kan Behia sa Magallanes, Sorsogon.
Sa report kan Magallanes Municipal Police, poco mas o menos alas 6:50 nin banggi kan Marso 6 kan mag-uli sa saindang harong an suspek na residente man kan nasambit na lugar.
Nagkaigwa nin dae pagkasinabutan an suspek asin an saiyang agom dahilan ta pinabakal subuot kan biktima an ibang gamit sa saindang harong na nagresulta sa pananaksak kan suspek sa biktima.
Nakahagad pa man kuta nin tabang an biktima sa mga kapitbahay makalihis na makaluwas sa saindang kusina asin tulos na isinakay kan mga kapitbahay sa bangka tangani na maidara sa Magallanes Medicare Hospital. Ipigbalyo ini sa Sorsogon Provincial Hospital pero tulos man binawian nin buhay.
Sa presente, padagos an paghanap kan otoridad sa duminulag na suspek. I Joey Galicio
Photo: Magallanes MPS